Dei fire bøkene: Slang, Vettskremt, Skrømt og Steindau er her slått saman til ei. Eg-personen er ikkje så modig og foretaksam som bestekameraten, Marius, og er for feig til å vedgå at han somme gonger er livande redd for åvere med på det Marius finn på. Difor hamnar gutane ofte opp i trøbbel dei med naud og neppe kjem seg ut av. Fiendar - men førebilete - er dei store gutane, Smokey og Børstesveisen, dei såkalla silkerampane, som bur i dei fine husa oppe i åsen. Dei syner ingen nåde når smågutane kjem i vegen for dei. Men hemnen kan og vere søt for hovudpersonane når dei greier å lure ungdomane, som er så usympatiske og karikerte at ein ikkje kan ta dei på alvor. Forfattaren syner at han er ein dyktig forteljar, men han slepp seg iblant så laus at han kanhende "trakkar ørlite over streken"? Handlinga er tidvis ulideleg spanande, men blir av og til så ellevill at det nærmar seg det groteske. Boka har gode skrifttypar som er lette å lese, og teikningane til Olav Hagen høver godt til ein tekst som kan gje ein lesar bakoversveis. Sund, Torvald. Ramp : bøkene om Marius og eg. Nyn. Aschehoug, 1995. 250s.,ill. Ill.: Olav Hagen. (Lesehesten). ISBN 82-03-24069-0 Barnebok. Dei fire bøkene om Marius og eg er her samla i ei bok: Slang, Vettskremt, Skrømt og Steindau. Illustrert av Olav Hagen. (Lesehesten).